CEBU PROVINCE – Nangayo ug pagsabot si Consolacion Mayor Joannes Alegado sa nakab-ot niini nga desisyon nga ikanselar na una ang Sarok Festival sa ilahang lungsod.
Gipasabot ni Mayor Alegado nga ang maong lakang isip paglikay sa makamatay nga 2019 novel coronavirus acute respiratory disease (N-CoV ARD).
Matud sa opisyal nga mas taas ang pagtakboy sa maong virus sa pangpubliko nga lugar kung diin nagpunsisok ang mga tawo hinungdan nga dili na una niini ipapadayon ang kasaulogan sa maong kapistahan.
Hinuon, gisaad sa mayor nga mahinayon ang ilahang Sarok Festival kung ugaling malinaw-linaw na ang ‘N-CoV scare’.
Samtang, gikalipay ni Mayor Alegado nga gihangop sa Kapitolyo ang mao niini nga lakang ug wala gayud kini babagi tungod ug alang usab sa kaluwasan sa tanan.
