Gipakomento sa Korte Suprema (SC) ang Senado nga tubagon ang mandamus petition nga gisang-at sa grupo ni kanhi Presidential Commission on Good Government special government counsel, Catalino Generillo Jr.
Diin ang petisyon gisang-at aron hangyoon ang Korte Suprema nga mandoan ang Senado nga sugdan dayon ang trial tungod kay ang konstitusyon wala magtugot sa paglangan niini, bisan naka-break ang Upper House.
Sa kamandoan sa SC, gimanduan niini ang Senado nga mosumiter og mga komento sulod sa napulo ka adlaw nga walay extension.
Matod sa tigpamaba sa SC nga si Camille Sue Mae Ting, ang petisyon gi-raffle niadtong Peb. 17 ug naapil dayon sa agenda sa SC.
Una nang nibarog si Senate Pres. Francis Escudero nga walay impeachment trial samtang nag-recess ang Senado, butang nga gikuwestiyon usab sa ubang legal nga mga luminaries ug mga kongresista.
Ug daghang mga abogado sa Mindanao nga gipangulohan ni Atty. Israelito Torreon ang misang-at sa Petition for Certiorari and Prohibition aron kuwestiyonon ang legalidad ug proseso sa impeachment complaint batok kang VP Sara.
