Nanawagan sa katin-awan nga usa ka concerned citizen kabahin sa pagsita ug pagbabag kanila sa iyang anak sa dihang mag-video recording unta kini sa Carbon Market Interim Building para sa proyekto sa eskwelahan.
Sa eksklusibong pakighinabi sa Bombo Radyo Cebu News Team kang Winefredo “Wine” Miro kay gipahayag niini ang pagpasabot sa iyang mi-viral nga video sa social media diin kuha sa akto ang pagbabag ug pagsita sa mga security guards sa Cebu2World Development Inc. (C2W) Management sa unta pag-video record nila sa pipila ka bahin sa merkado para unta sa pagmugna og proyekto sa iyang anak.
Gani miaksyon pa daw kini og ilog sa cellphone ang maong sekyu ngadto sa kauban ni Miro sa ilang pag-kwestiyon kung nganong bawal ang video recording sa merkado nga usa man kini ka pampulikong lugar bisan og ang nagdumala kay pribadong kumpanya.
Gani sugyot ni Miro karon sa mga opisyales sa Kagamhanang Dakbayan sa Sugbo ilabi na ni Cebu City Mayor Nestor Archival Sr. ang sitwasyon sa merkadong Carbon kung pampubliko pa ba kini o pribado na tungod sa mga polisiyang gipatuman ilabi na sa video recording nga dili man unta kini makalapas sa Data Privacy Act ang ilang katuyuan.
Samtang sa pikas bahin, ang C2W Management kay miluwat og pamahayag kabahin sa insidente diin gihimug-atan niini nga gitugotan ang pag-video recording ug vlogging sa Carbon Market ug nangayo kini og despensa sa nabuhat sa ilang Security Team sa “lapse in judgment” ug sa unta mas maayong pagdumala sa sitwasyon nga wala misangpot sa kakulian.
Gidugang niini nga ang Carbon Market kay nagpabilin pampubliko ug panag-iya sa kagamhanang dakbayan apan sila sa C2W Management kay ka-sosyo lamang aron sa pagtuman sa Joint Venture Agreement sa Redevelopment Project sa merkado.
