CEBU CITY – Nalimbuwad ang usa ka school van human kini nga gibangga-an ug military truck sa sentro sa dalan R. Cabahug ug M. Logarta sa dakbayan sa Sugbo kaganihang buntag.
Giila ang drayber sa school van nga si Romero Aurellos, 51 anyos, samtang ang drayber usab sa military truck mao si Staff Sergeant Andres Rumbines.
Sa pakighinabi sa Bombo News Team ni Police Staff Sergeant Mark Lester Calib-og, traffic investigator sa Cebu City Police, matud pa nga paspas ang dagan sa duha nga susamang milabang sa junction.
Sa inisyal nga imbestigasyon, gipadayag ni Police Staff Sergeant Calib-og nga misulay pagpahunong si Staff Sergeant Rumbines sa gimaneho niini nga military truck apan padayon kini nga mibangga sa rear end sa van.
Napulo katawo ang sakay sa nahisgutang school van kung diin kadaghanan niini mga estudyante.
Dali nga gidala sa tambalanan ang drayber sa school van human kini nga nasamdan ug naglisod sa pagginhawa.
Samtang duha sa mga estudyante ang gidala usab sa tambalanan human nga nakaangkon ug samad sa lawas.
Nasayran nga paingon unta sa ilahang Christmas party ang mga nahisgutang estudyante kauban ang pipila ka mga ginikanan.
Sa pagkakarun, padayon nga gisuta sa kapulisan ang estado sa samaran nga drayber ug mga estudyante.
