Mokita og kapin sa 100-mil yuan o kapin sa 15-mil dolyares kon kapin sa 945-mil pisos matag bulan ang usa ka 32-anyos nga lalaki sa China tungod sa iyang duha ka scratching salon sa Shenzhen, diin ang mga kustomer mobayad aron maka-relax pinaagi sa hinay-hinay nga pagkatol sa ilang lawas.
Nakuha ni Zhang Xiaochao ang maong ideya human siya nakatan-aw og video online sa usa ka asawa nga gikatol-katol ang likod sa iyang bana kondiin iyang nadumduman nga sukad pa sa iyang pagkabata, ganahan na usab siya nga katol-katulon sa iyang amahan ang iyang likod hangtud nga makatulog.
Dinhi na siya nakahukom nga himoon kini nga serbisyo kondiin kini ang iyang gipuli sa una niyang negosyo nga napalpak ug gisugdan niya kini niadtong Mayo.
Sa iyang scratching salon, mohigda ang mga kustomer samtang ang mga staff nga nagsul-ob og plastik nga mga kuko maoy mukatol-katol sa ilang lawas bugti sa bayad nga 300 yuan kon kapin 41 dolyares o bugti sa 2,500-pisos kada oras.
Nasayran nga tumong sa maong serbisyo nga maminusan ang stress sa ilang kliyente ug makatulog og maayo. Tungod sa kalampusan sa negosyo, plano ni Zhang nga mag-abli pa og 100 ka mga branches niini sa nagkada-iyang bahin sa China.
