METRO MANILA-Gihingusgan ang screening sa mga mosulod ug mogawas sa Pilipinas taliwa sa hulga sa mpox o naila kaniadto nga monkeypox.
Sumala sa Department of Health, ang mga biyahedor kinahanglang modeklarar sa ilang eTravel nga porma kon sila adunay mga pantal, vesicles o blisters sa milabay nga 30 ka adlaw sa dili pa mobiyahe isip kabahin sa surveillance batok sa mpox aron mapugngan ang pagsulod sa dugang nga mga kaso niini nga sakit gikan sa lain nasud.
Gihatagan usab og gibug-aton sa DOH nga importante alang sa tanang mga biyahedor nga matinud-anon sa pagtubag sa pangutana sa eTravel form kon sila nakasinati og sakit sa milabay nga 30 ka adlaw.
Dugang pa, sa higayon nga ang biyahedor nga miabot sa Pilipinas gikan sa usa ka nasud nga gilista sa World Health Organization isip outbreak area, adunay kasaysayan sa pagkaladlad sa mga kaso sa mpox o bisan unsa nga mga sintomas o mga timailhan sa sakit, ang eTravel system ang mag-alerto sa Bureau of Quarantine ug Bureau of Immigration unya i-refer sa BI ang pasahero sa BOQ para sa ikaduhang screening.
Kung ang pasahero mahibaw-an nga suspek nga kaso sa mpox, dad-on kini sa mpox referral hospital.
Sa pagkakaron, adunay kinatibuk-ang 14 ka kaso sa mpox ang natala sa Pilipinas sukad Hulyo 2022 diin 9 niini ang naka-recover sukad niadtong 2023 samtang 5 ang aktibo nga kaso nga nagpaabot pa aron matambalan ang mga sintomas. Ang 5 ka aktibong kaso sa mpox positibo sa clade II, usa ka mas malumo nga matang sa mpox virus.
Matud pa nga ang Mpox usa ka makatakod nga sakit nga gipahinabo sa buti o “smallpox” nga makuha gikan sa mga hayop sama sa unggoy, ilaga ug iro o kasagaran nga mapasa gikan sa tawo pinaagi sa pagkontak sa mga tawo nga adunay monkeypox. Ang mga simtomas mao ang hilanat, labad sa ulo, sakit sa lawas ug paghubag sa mga lymph node ug kakapoy, pantal ug pagporma sa “blisters”. Sa pagkakaron, adunay bakuna nga mpox nga epektibo sa pagpanalipod batok niini nga virus.
