Sakto ug lig-on na nga basehanan ang nahitabong insidente atol sa 2025 Southeast Asian o SEA Games sa Thailand aron mopasaka og reklamo sa ethics batok kang Leyte 4th District Rep. Richard Gomez.
Kini ang klarong pamahayag ni House Committee on Public Accounts Chairman Terry Ridon sa Bicol Saro Party-list.
Matud pa ni Ridon, ang giingong pag-atake ni Rep. Gomez kang Philippine Fencing Association o PFA President Rene Gacuma, nga nakuhaan og video ug mikatag na, usa ka seryosong insidente nga nakadaot sa dignidad, imahe, ug reputasyon sa House of Representatives.
Base sa mga report, gilauman na nga personal nga mopasaka og reklamo si Gacuma sa House Committee on Ethics and Privileges, nga gipangulohan ni 4Ps Party-list Rep. JC Abalos.
Giklaro usab ni Ridon nga dili kinahanglan nga pulitiko ang magreklamo, kay bisan pribadong indibidwal adunay katungod nga mopasaka og ethics complaint batok sa usa ka kongresista.
Dugang pa ni Ridon, ang tanang posibleng silot o penalidad batok kang Rep. Gomez ipailalom sa desisyon sa ethics committee, ug pinal nga pagahukman sa plenaryo sa House of Representatives.
