CEBU CITY – Walay kabutangan ang kalipay nga gibati sa mga kabanay ni Andrew Kim Remolino, ang SEAG triathlon silver medalist, sa kalampusan nga nakab-ot sa nahisgutang atleta.
Sa eksklusibo nga pakighinabi sa Bombo News Team, gibutyag ni Cesar Abellana Sijas, ang uyo-an ni Remolino, nga dako nilang kalipay ug garbo nga nalangkat sa iyahang pag-umangkon ang unang silver medal alang sa Pilipinas sa SEA Games 2019.
Matud ni Sijas nga saksi kini sa kakugi ug determinasyon sa iyahang pag-umangkon sa gisudlan niini nga natad sa paugnat sa kusog.
Gisaysay niini nga gikan sa tunghaan, muabot sa balay ug mudiretso na ug practice si Remolino sa paglangoy, pagdagan, ug cycling, ug gani adunay higayon nga lawum nang gabii kini mabalik sa ilahang panimalay.
Sigon pa nga 3 anyos pa lang si Remolino sa dihang nagsugod na kini paglangoy ug didto nakita-an kini ug potensyal sa iyahang amahan nga si Roland Remolino nga usa usab ka swimming coach.
Midako si Remolino nga tinudlu-an sa iyahang amahan hangtod nga ilaha nang gi-master ang tulo ka mga ‘athletic events’ hangtod nga pormal na kining misalmot ug triathlon.
Gipaambit usab ni Sijas nga gawas sa amahan, anaa usab ang duha ka mga igsuon ni Kim nga sila si Icy ug Joana Remolino, ang lakip nga nag-coach sa 19 anyos nga triathlete.
Nasayran nga nag-abot na usab si John Chicano, ang SEAG ’19 triathtlon gold medalist ug Remolino sa pipila na ka triathlon ug napildi na kini sa Talisaynon nga atleta.
Nagpasalamat usab si Sijas sa Bombo Radyo Cebu gumikan kay pinaagi sa sibyaanan sila nasayod sa kalamposan nga nakab-ot sa iyahang pag-umangkon.
