TALISAY CITY, Cebu – Gipasar na sa konseho sa dakbayan sa Talisay ang resolusyon nga giduso ni City Councilor Josefa Ylanan kansang maghatag ug pondo sa pagpangita ug “Cleanest and Greenest Barangay”.
Katuyo-an sa maong resolusyon ang paghimo sa mga barangay sa Talisay City nga usa ka ‘livable community’.
Gawas sa mga barangay, nag-awhag usab ang maong resolusyon sa mga tunghaan ug mga organisasyon sa dakbayan nga musalmot sa maong kalihokan.
Gi-umol usab sa konseho ang usa ka team nga mao’y mupatuman niini.
Nasayran nga ang barangay nga makadawat sa unang ganti ang makakuha ug P30,000 ug trophy; P20,000 ug trophy alang sa ikaduhang makadaug; ug P10,000 alang sa makadawat sa ikatulo nga ganti.
Ang maong resolusyon ang isip suporta usab sa kampanya ni Talisay City Mayor Gerald Anthony ‘Samsam’ Gullas nga Aksyon Agad.
