Cebu City-Gituldukan na usab ang pagpahigayon sa search and retrieval operation sa lawas ni Bien Unido Mayor Gisela Boniel nga gituohang gilabay sa kadagatan nga sakop sa Lapulapu City human kini giingong gipatay sa mister niini nga si Bohol Board member Nino Rhey Boniel.
Atol sa katapusang adlaw sa pagpangita sa lawas sa Mayor, mikuyug sa pagdive ang igsuon ni Mayor Gisela nga si Mikay Bendong apan sama sa mga nauna ng gipahigayong pag dive, pakyas gihapon nga makita ang lawas sa mayor. Emosyonal naman nga kabanay sa Mayor sanglit hangtud karon wala gyud makit-e ang lawas niini.
Hustisya usab ang gisyagit sa pamilya Bendong alang sa kamatayon sa ilang kabanay. Gipasalamatan naman ni Mikay Bendong ang mga sakop sa search and retrieval team hilabi na ang mga civilian diver nga way puas sa paghatag sa ilang panahon aron nga makatabang sa operasyon.
Gibutyag usab ni Police Chief Inspector Jacinto Mandal Jr, nga bisag wala nila makit-e ang lawas sa mayor, dili gihapon maingon nga pakyas sila sanglit matud pa nga nakita man nila ang habol ug pipila ka lugas sa buhok nga posibleng gipanag-iya ni Mayor Gisela.
Matud pa ni Mandal nga andam lang gihapon sila nga musawom pagbalik kung adunay kamanduan gikan sa kadagkuan sa Police Regional Office 7 ug kung adunay makitang timailhan nga naa sa ilawom sa dagat ang lawas ni Mayor Gisela Boniel.
