CEBU CITY-Dili mutugot si Cebu City Mayor Edgardo Labella nga ipaubos sa Modified General Community Quarantine (MGCQ) ang dakbayan.
Kini subay sa giingong sugyot ni COVID-19 Visayas Overseer Gen. Roy Cimatu nga ipaubos sa MGCQ ang dakbayan human nga mikunhod na ang kaso sa COVID-19 matag adlaw.
Matud ni Mayor Labella sa dihang nahinabi sa Bombo Radyo Cebu atol sa tulumanong Bombohanay Bigtime nga gusto niini nga maandan sa mga tawo ang batasan sa dihang anaa pa sa Enhanced Community Quarantine (ECQ) ang dakbayan.
Giangkon niini nga usa ka hagit karun sa iyahang administrasyon ang pagmintinar sa ubos nga kaso sa virus dinhi sa dakbayan. Gipasabot usab sa mayor nga misaka ang kaso sa COVID-19 gumikan sa mga gipahigayon nga mass testing diin hangtud karun kini nagpadayon.
Sigon pa nga gitambagan kini nga hunungon na ang mass testing arun nga mapaubos pa ang kaso nga matala matag adlaw apan giingong wala kini musugot sa maong suhestyon gumikan kay giingong angayan lang kini nga mapakgang.
10 % capacity gitugot na sa IATF sa simbahan
Giipahibalo usab ni Labella nga mihatag na ug pagtugot ang IATF nga makasulod na sa Simbahan ang mga tumutuo apan kutob lang kini sa 10% sa kapasidad niini.
Gitataw niini nga dili lang kini alang sa mga simbahan sa Katoliko, lakip na usab sa uban pang relihiyon. | SBR
