CENTRAL VISAYAS- Gipahigayun ang labing unang Philippine Tour Guides Summit sa usa ka dakong hotel nga nahimutang sa South Road Property,ning adlaw nga Miyerkules, Septyembre 17, 2025.
Ang summit gimugna sa Department of Tourism (DOT) ubos sa temang “Love our Islands, Love our Stories.”
Gitambongan kini sa kapin 400 ka mga tour guides nga naggikan sa nagkadaiyang rehiyon sa tibuok Pilipinas.
Personal nga mitambong sa maong kalihokan si DOT Secretary Cristina Frasco, nga maoy nangulo sa pagbukas sa summit ug sa paghatag og mensahe sa importansya sa mga tour guides isip mga frontline storytellers sa kultura ug kasaysayan sa nasud.
Base sa pinakabag-ong datos sa DOT, kutob sa Agosto 31, 2025, aduna nay 4,598 ka regional ug community tour guides nga opisyal nga na-accredit sa ahensya.
Gawas pa, ang Central Visayas ang nanguna sa may labing daghang tour guides nga niabot sa 2,020 ka buok, nagpamatuod sa kusog nga turismo sa rehiyon.
Tumong sa maong kalihokan ang paghimo og national platform alang sa mga tour guides, industry stakeholders, ug mga policy makers aron magkahiusa sa collaboration, dialogue, ug pagplano alang sa umaabot nga kalambuan sa tour guiding sa Pilipinas.
Lakip sa mga gitinguha sa summit ang pagpalambo sa professionalism sa tour guiding services, pagpausbaw sa kalidad sa serbisyo nga ihatag sa mga turista, ug ang pagpasiugda sa enriching ug authentic experience alang sa mga bisita sa nasud.
