Cebu City-Susamang naibtan og tunok kung mahulagway sa Security Guard nga si Erwin Macua ang iyang pagpasar sa Licensure Examination for Teachers nga gipagawas karong adlawa.Matud ni Macua nga nagbunga ang tanan niya nga mga pagpaningkamot.
Sa ekslusibong pakighinabi sa Bombo Radyo Cebu kang Macua,giingon niini nga lisod ang iyang naagi-an sa pagreview sa wala pa ang exam tungod kay sa gabii muduty siya isip security guard.
Matud pa ni Macua nga wala siyay saktong tulog mao nga grabe ang iyang kalipay ug dako iyang pasalamat sa Diyos nga karon usa na siya ka board passer.Gipa-ambit usab ni Macua ang iyang plano karon nga hingpit na siya nga maestro, magtudlo na siya sunod tuig.
Dugang pa niini gibutyag usab niya nga pwede na unta siya nga magtudlo human siya nga mi-graduate niadtong Marso sa kurso nga Bachelor of Elementary Education Major in General Education.Pero mingawon matud pa siya sa iyang pagka security sa St. Theresa’s College kung diin siya nagbantay sulod sa 20 ka tuig.
Mensahe ni Macua sa mga gusto nga mulampos nga himoong siyang panig-ingnan ug inspirasyon para makab-ot ang damgo ug mipaabot usab kini og mensahe para sa sama niya nga medyo may edad na nga aduna pa gyud paglaum ug dili pa uwahi ang tanan para makab-ot ang gipangandoy.
