CENTRAL VISAYAS- Nakahan-ay na ang seguridad alang sa venue sa ika-48 nga ASEAN Leader Summit 2026 sa Dakbayan sa Lapu-Lapu, diin pagasugdan kini gahapon sa gabii, Mayo 6, ug molanat kini hangtud na sa Biyernes, Mayo 9.
Mao kana ang gikabutyag ni Police Colonel Kimberly Molitas, ang Police Regional Office-7 Chief of Staff ug kasamtangan nga PRO-7 ASEAN Spokesperson, diin atol sa gihimong simultaneous simulation exercise, gikanayon niini nga nakaplastada na ang security groups nga gilangkoban sa Philippine National Police (PNP), ug ilabi na ang leading agency niini sa Police Regional Office-7 ubos sa pagpangulo ni PBGen. Arnold Abad.
Dugang pa niini, ang mga security forces nga gihatag sa Arm Forces Philippines (AFP), Presidential Security Command, ug uban pang mga back-up auxiliaries, ilabi na ang Bureau of Fire Protection-7, ug Philippine Coast Guard (PCG).
Busa, malaomon si Molitas nga walay mahimamat nga mga kakulian atol sa dakong kalihokan, ilabi na nga ang Cebu kanunay nailhan nga malinawon, sa tanan nga mga kalihokan nga gi-host niini subay sa kasaysayan, hinungdan nga gitino niini nga mas determinado kaayo sila nga masiguro nga parehas ra kana labi na sa pag-host sa mga pangulo sa estado nga mobisita sa nasud.
Samtang, nakatabang usab matud pa sa siguridad ang pag deklara nga holiday sa tulo ka siyudad nga mao ang dakbayan sa Lapu-Lapu, Mandaue, Cebu ug ang lungsod sa Cordova, diin kini subay sa rekomendasyon sa mga tinugyanan sa balaod ug mga ahensya aron masiguro nga mahatag gyud ang hugot nga siguridad sa tanang mga delegado sa ASEAN Summit.
