Gipahugtan ang seguridad sa Tejero ning dakbayan sa Sugbo isip lakang sa nahitabong riot tali sa duha ka grupo sa mga menor de edad niadtong Sabado diin nakuhaan og video ug daling mikatap online.
Kini ang gipaambit ni Police Captain Raymart Rabanes, Officer-in-Charge (OIC) sa Waterfront Police Station, atol sa pakighinabi sa Bombo Newsteam.
Aron mapugngan ang pagbalik sa susamang insidente, nagpahigayon ang kapulisan og mga preventive measures ug nakig-coordinate sa mga opisyal sa barangay aron mas pahugtan pa ang gipatuman nga seguridad, ilabi na kon gabiing dako.
Gidoble usab ang ilang mga pagpahigayon sa mga operasyon sama sa “Oplan Pakigsandurot” ug “Oplan Bungkag” isip kabahin sa ilang mga lakang alang sa seguridad.
Dugang ni PCAPT. Rabanes, nagbutang na sila og fixed post o gi-deploy nga mga pwesto diin adunay mga presenya sa pulis nga magbantay sulod sa 24 ka oras aron masiguro ang kalinaw ug seguridad sa lugar.
