CEBU CITY-Gitumbok nga selos ang hinungdan sa gipusil ug gitigbas-patay ang usa ka kanhi piniriso nga biktima sa kasagbutan sa Sitio Upper Puti, Brgy. Buhisan ning dakbayan sa Sugbo.
Giila ang biktima nga si Rico Oquiño, 25-anyos nga taga Brgy. Matab-ang dakbayan sa Toledo, apan lumad nga taga Leyte.
Sa pakighinabi sa Bombo Radyo Cebu kang Gerome Cruz, ang hepe sa Tanod sa Brgy. Buhisan diin gibutyag niini nga panagsa ra kini makit-an sa maong dapit tungod sa iyang ka-live in partner nga anaa sa maong dapit kinsang wala magdahom nga iyang kapuyo na diay ang gipatay.
Basi sa inisyal nga imbistigasyon nga nakadungog og lanog sa buto sa armas ang mga silingan apan, buntag na kini gitapuk-an og nasayran nga adunay nagbuy-od nga patayng lawas.
Samtang ang gitumbok sa kalive-in partner sa biktima nga si Jarisa Biasong nga si Jephosin Cantunao, 30-anyos ug iyang kanhi kapuyo ang maoy responsabli sa kamatayon ni Oquiño.
Matud pa ni Biasong nga si Cantunao kanunay nga mobahad ngadto sa biktima tungod nagselos ang suspect ug wala pa nakadawat nga gibuwagan ni Biasong.
Pito ka tuig nga nag-ipon si Biasong ug Cantunao ug adunay 3-anyos nga anak apan nagkabuwag tungod sa pasangil nga tig-gamitan og illegal nga drogas ang suspect ug byador.
Ipa-autopsy pa sa kapulisan ang biktima aron masuta unsa pa ang laing samad niini gawas sa samad tinigbasan sanglit wala sila makakitag samad pinusilan sa lawas sa biktima.
