CEBU CITY-Gumikan sa selos sa kanhi uyab sa usa ka babaye ang hinungdan sa pagdagmal sa usa ka lalaki sa Barangay Tisa sa dakbayan sa Sugbo sayo sa buntag, Septiyembre 24, 2023.
Kini ang gitino ni Police Major Angelito Valleser, hepe sa Labangon Police Station, nga ang bag-ong uyab sa babaye giingong nagselos sa pagkakita sa kanhi uyab sa babaye sa maong dapit.
Matod ni Valleser nga sa wala pa ang kagubot pasado alas 2 sa kaadlawon, giingong gisumbag sa biktima ang usa sa lima ka mga lalaki nga miatake sa biktima nga nakuhaan og video sa usa ka netizen.
Kini nga impormasyon gihatag sa usa sa lima ka mga lalaki, kinsa nasikop gahapon sa buntag sa mga polis sa Labangon Police Station.
Giila ni Valleser ang nasikop nga suspek nga si Angelo Lauza, 21, taga Barangay Tisa, ug ang upat pa ka kauban nga sila si Charles Lauza, 18; Arnel Lauza, usa ka Paciao, ug Penserin Modiquillo, nga nagpabilin nga gawasnon.
Silang tanan pulos lumolupyo sa Barangay Tisa, dakbayan sa Sugbo.
Sa pikas bahin giklaru ni Konsehal Philip Zafra, ang Chairman sa Committee on Peace and Order sa Dakbayan, nga ang maong nimugna ug kagubot pasakaan ug kaso nga ‘alarm scandal’.
Gipanghimangnoan usab niini ang mga katawhan ilabi na ang mga kabatan-unan nga kung ugaling man makainom, ibutang kini sa lugar ug dili magbuhat ug mga kagubot.
