CEBU PROVINCE-Tumang selos ug kapungot hinungdan nga gidunggab sa usa ka lalaki ang iyahang suod nga higala sa Sitio Tindahan, Barangay Can-asujan, dakbayan sa Carcar, probinsiya sa Sugbo.
Giila ang biktima nga si Jovy Nuñez, 25-anyos, samtang naangol ang higala niini nga si Jay Mark Labitad, 24-anyos, ug ang suspek ang giila nga si Gilbert Lauron, anaa na sa ligal nga panuigon.
Sa pakighinabi sa Bombo Radyo Cebu kang Police Lieutenant Colonel Ardioleto Cabagnot, ang hepe sa Carcar City Police Station, nga mitahan sa iyahang kaugalingon ang suspek sa dihang ilaha kini nga gipangita sa bukiran nga bahin sa Barangay Can-asujan human nga gihimo ang krimen.
Matud ni Cabagnot nga sa ilahang pakighinabi sa suspek, giingong niadtong nakalabay nga tuig, gikamang sa biktima ang iyahang asawa apan gumikan kay suod kini niya nga higala ug gipa-puyo pa sa ilahang panimalay hinungdan nga iyaha kining gipasaylo.
Apan niadtong Marso 01, 2023, giingong mi-text ang biktima sa asawa sa suspek hinungdan sa iyahang pag-alburoto ug mihukom nga sulongon ang biktima.
Walay pagduha-duha nga gidunggab sa suspek ang biktima sa makadaghan nga higayon ug sa dihang misulay pag-pugong ang higala nga si Labitad hinungdan nga naangol usab kini sa maong pagpanunggab.
Kasong frustrated murder ang ipasaka batok sa suspek nga nagtingkagol na karun sa Carcar City Police Station lock-up cell, samtang anaa na usab sa luwas nga kahimtang ang mga biktima.
