Mipalag si Senador Christopher “Bong” Go sa akusasyon sa Office of the Prosecutor sa International Criminal Court (ICC) nga nagngalan kaniya isip kauban o kakunsabo ni kanhi Presidente Rodrigo Duterte sa usa ka kaso sa krimen batok sa katawhan nga may kalabotan sa madugoon nga war on drugs.
Sa usa ka pahayag nga gipagawas sa Senador karong gabii, miingon kini nga karon lang niya nahibal-an ang mga alegasyon nga gipahamtang batok kaniya sama sa giingon sa gi-redact nga bersyon sa Dokumento nga naglangkob sa mga kaso nga gi-isyu sa ICC gikan sa Office of the Prosecutor kagahapon, Pebrero 13.
Hugot nga gihimakak sa Senador ang mga alegasyon nga hingpit nga walay basehan, gidapigan, dili patas ug walay kalabotan sa iyang tahas ug mga responsibilidad sa dihang nagserbisyo siya isip Special Assistant ni kanhi Presidente Duterte gikan sa Hunyo 2016 hangtod Oktubre 2018 ingon man Executive Assistant sa Mayor sa Davao City gikan sa 1998 hangtod 2016.
Gipanghimakak usab sa Senador ang bakak nga akusasyon nga siya nagsilbi isip Chief sa Presidential Management Staff, tungod kay wala gayud niya gihuptan ang maong posisyon.
“Throughout my career, I have upheld the highest standards of integrity, transparency, and dedication to the welfare of our people. I will not allow these baseless accusations to distract me from my responsibilities as a duly elected Senator of the Republic. My focus remains steadfastly on serving the Filipino people—particularly the poor and vulnerable,” pagpasabot sa Senador.
