Giisip nilang Senador Ramon ‘Bong’ Revilla ug Senador Robin Padilla nga dakong kadaugan sa mga trabahante sa entertainment industry ang pagpasar sa Eddie Garcia Law o Republic Act 11996.
Gani gipasalamatan sa duha ka senador si Presidente Ferdinand R. Marcos Jr. sa pagpirma sa balaod nga gitumong sa pagpauswag sa kaayohan sa mga anaa sa industriya sa telebisyon ug salida.
Gipahinungod ni Revilla ang maong balaod ngadto sa kanhi beteranong aktor nga si Eddie Garcia, kinsa nitaliwan sa tunga-tunga sa trabaho.
Nanghinaot si Padilla nga pinaagi niining maong balaod molambo ang kahimtang sa pagtrabaho sa naasoy nga industriya.
Ang Eddie Garcia Law nagsiguro nga ang mga trabahante sa salida ug telebisyon mahatagan og proteksyon sa ilang mga amo sa ilang trabahoan.
Gipahayag usab niini nga ang amo kinahanglang mopatuman sa insaktong oras sa usa ka ordinaryo nga trabahante, maghatag sa hustong suholan ug katugbang nga mga benepisyo sama sa social security ug uban pang benepisyo, batakang panginahanglan, panglawas ug kaluwasan, kondisyon ug sumbanan sa pagtrabaho, ug insurance sa trabahante.
