Nisang-at og reklamo ang usa ka abogado og ethics complaint batok kang Senate Deputy Majority Leader ug Ethics Committee Chair Senator JV Ejercito, tungod sa giingong gross negligence of duty human giingong wala niya gihimo ang aksyon sa reklamo batok kang Senador Francis “Chiz” Escudero.
Gikumpirmar ni Ejercito nga nadawat niya ang reklamo gikan ni Atty. Marvin Aceron, kinsa miingon nga kapin sa 109 ka adlaw na ang milabay sukad gisang-at ang reklamo batok kang Escudero apan walay aksyon nga gihimo, lakip na ang paghatag og case number o ang pag-isyu og notice.
Gipasabot ni Ejercito nga ang ethics committee dili pa makahimo og hearing tungod kay wala pa kini hingpit nga natukod. Dugang niini nga ang Senado mosunod sa mga lagda ug due process niini, ug paminawon ang mga kaso sa han-ay sa pagsang-at niini kung makompleto na ang komite.
Ang reklamo batok kang Escudero may kalabutan sa ₱30-milyon nga donasyon sa kampanya nga iyang nadawat niadtong 2022 gikan sa kontraktor nga si Lawrence Lubiano. Giinsistir ni Escudero nga ang donasyon legal ug gideklara, ug niadtong Nobyembre 2025, gi-abswelto sa Political Finance and Affairs Department (PFAD) sa Commission on Elections sila si Escudero ug Lubiano human nila natino nga si Lubiano ug ang iyang kompanya managlahing legal nga entidad.
Ubos sa Omnibus Election Code, gidili ang mga donasyon sa politika gikan sa mga kontraktor sa gobyerno.
