Mipahayag si Senador Francis “Chiz” Escudero nga dili niya dawaton ang posisyon isip Bise Presidente kon mapamatud-ang sad-an si Vice President Sara Duterte sa impeachment trial ug matangtang kini sa katungdanan.
Matod ni Escudero, mahimong motumaw ang conflict of interest o panagsumpaki sa interes kon dawaton niya ang maong posisyon, ilabi na kay usa siya sa mga senador-hukom nga modesisyon sa impeachment case batok kang Duterte.
Bisan wala pa siyay nadawat nga pormal nga tanyag, gipasiugda sa senador nga nakahukom na siyang balibaran kini kon itanyag kaniya sa umaabot.
Subay sa Konstitusyon, kon mabakante ang posisyon sa Bise Presidente, ang Presidente mahimong magtudlo og kapuli gikan sa mga miyembro sa Senado o sa House of Representatives, nga magkinahanglan sa pag-uyon sa kadaghanan sa tanang miyembro sa duha ka kapunongan sa Kongreso, nga magboto nga bulag.
Gipasalig usab ni Escudero nga magpabilin siyang patas ug walay gidapigan sa impeachment proceedings batok kang Duterte.
Matod niya, ang desisyon sa mga senator-judge kinahanglan ibase sa ebidensya, dili sa resulta sa mga survey.
Samtang, human sa pagtapos sa presentasyon sa ebidensya sa habig sa prosekusyon, gikatakdang sugdan sa depensa ang pagpresentar sa ilang mga saksi ug ebidensya sa Nobyembre 9.
