Nipadayag si Senador Risa Hontiveros sa iyang suporta sa pagkunhod ug pagbalhin sa House of Representatives sa kapin sa P1.3 bilyones nga pundo gikan sa Office of the Vice President alang sa 2025.
Matod ni Hontiveros, mas maayong ibalhin ang maong pundo ngadto sa Department of Health (DOH) ug sa Department of Social Welfare and Development (DSWD), tungod kay ang duha ka ahensya adunay konkretong social ug health services.
Giinsister sa Senador nga ang maong mga pundo magamit sa pagpalambo sa serbisyo sa panglawas ug katilingbanon sa Pilipinas ug pagtabang sa mga kabus, ilabi na niadtong adunay mga sakit.
Dugang ni Hontiveros, kung gikinahanglan nga debatehan ang pundo sa bicameral conference, iya kining suportahan.
Nanghinaot usab ang Deputy Minority Leader nga motambong si VP Sara Duterte sa budget hearing.
Pipila ka adlaw sa wala pa kini, ang Ubos Balay Balauranan nipahibawo sa ilang pinal nga desisyon nga laslasan ang budget sa OVP og kapin sa P1.3 bilyones diin kapin sa P646.5 milyones niini ang ibalhin sa DSWD ug gamiton ubos sa Assistance to Individuals in Crisis Situation (AICS) program.
Ang katunga niini igahin sa DOH ug gamiton sa programa niini nga Medical Assistance for Indigent and Financially Incapacitated Patients (MAIFIP).
Hinungdan sa mga kongresista, adunay ‘overlapping’ sa programa sa OVP ug sa DOH ug DSWD mao nga gibutang niini ang maong pundo.
