BOMBO EXCLUSIVE: Gihulagway ni Sen. Imee Marcos nga usa ka “paglusob” ug “assault” ang nahitabo sa Senado atol sa kontrobersyal nga operasyon nga nalambigit sa giingong pagsulay sa pag-aresto kang Sen. Ronald “Bato” dela Rosa.
Sa eksklusibong pakighinabi sa Bombo Newsteam, gisaysay ni Marcos nga nakurat sila human makadungog og sunod-sunod nga buto samtang nagtapok sa opisina sa Senate President aron hulaton ang Articles of Impeachment gikan sa House of Representatives.
Matud niya, una nilang gihunahuna nga fireworks lamang ang nadungog nga pagpabuto, apan misamot kini kakusog nga maoy hinungdan sa ilang pagkataranta.
Gipadayag usab sa senadora nga adunay mga operatiba nga misulod sa compound sa Senado ug gisulayan pagbungkag ang pader nga nagbahin sa GSIS building ug sa Senado.
Sumala kaniya, napugos pagpabuto ang Senate security personnel isip warning shot, apan ang NBI nibalos og sunod-sunod nga pagpabuto. Tungod niini, gi-secure sa mga personahe sa OSAA ang mga entrada pinaagi sa pagbabag sa mga lamesa human adunay mga armadong indibidwal nga giingong nakasulod sa lugar.
Giangkon usab ni Marcos nga naapektuhan ang pipila ka bahin sa building, lakip ang mga bintana ug pader, tungod sa maong hitabo. Dugang pa niya, gipalong usab nila ang suga sulod sa opisina tungod sa kahadlok nga maigo sa pagpamusil gikan sa gawas.
Sa dihang gipangutana kabahin sa pamahayag ni Undersecretary Claire Castro nga walay “assault operation” nga gihimo ang National Bureau of Investigation (NBI), gitubag kini ni Marcos nga klaro nga “assault” ang nahitabo tungod sa pagsulod sa mga armadong personahe ug sa sunod-sunod nga pagpabuto sulod sa vicinity sa Senado.
Sa pagkakaron, wala pa mopagawas og dugang opisyal nga detalye ang Senado ug ang uban pang mga awtoridad kalabot sa maong insidente.
