Daw nalimbuwad ang tuyok sa panahon human nga gilitok ni kanhi Bulacan assistant District Engineer Brice Hernandez ang pangalan nila ni Senador Jinggoy Estrada ug Senador Joel Villanueva nga giingong nalambigit usab sa anomalosong flood control projects.
Kini human nga gihinganlan ni Hernandez ug miingon nga dili diay luwas si Estrada sama sa giingon ni Sen. Rodante Marcoleta gahapon sa Senate Blue Ribbon Committe sa dihang gipangutana ang magtiayong Discaya kung wala ba’y Senador sa ilang listahan.
Gawas sa duha ka senador kay lakip usab sila si Undersecretary Robert Bernardo, ug DE Alcantara.
Matud niini nga nigahin si Sen. Jinggoy og P355 milyones karong tuiga alang sa pipila ka mga proyekto sa Bulacan samtang anaa sa P600 milyones nga kantidad ang kang Villanueva ug ang “SOP” sa mga senador kay 30%.
Apan, gihimakak ang alegasyon ni Sen. Estrada ug nihagit kang Hernandez nga mopaubos og LIE DETECTOR TEST aron masuta nga bakak ang pagdawit ni Engr. ug limpyo ang iyang konsensya ug walay kalambigitan sa anomalyang flood control projects.
Sa pikas bahin, gihatagan usab og katin-awan ni Pacifico ‘Curlee’ Discaya nga wala siyay direktang contact nila ni House Speaker Martin Romualdez ug kanhi House appropriations panel chairperson ug Ako Bicol Party-list Representative Zaldy Co.
Kini human nga daghan siya nga nadawat nga tawag nga nangutana og duna bay direktang kontak apan giingong mao lang kini ang kanunay nga iyang madungog sa mga politiko diin gipadala ug gipakuha na sa duha ka opisyal.
