Gikondenar ni Senate Committee on Labor and Employment Vice Chairperson Senador Raffy Tulfo ang temporary restraining order (TRO) nga gi-isyu sa Pasig City Regional Trial Court Branch 152 batok sa pagpatuman sa P85 nga wage increase alang sa mga minimum wage earner sa Metro Manila.
Ang TRO resulta sa petisyon sa Readycon Trading and Construction Corporation ug R-11 Builders, Inc. nga nagtinguha nga mapugngan ang Regional Tripartite Wages and Productivity Board-NCR ug National Wages and Productivity Commission sa pagpatuman sa wage hike hangtod Agosto 13.
Kung diin, ang P85 nga dugang sa sweldo gibahin sa duha ka hugna: P60 nga gipatuman niadtong Hulyo 25 ug P25 nga gikatakdang ipatuman sa Enero 1, 2027.
Gikwestyon ni Tulfo ang maong TRO, nga iyang giingong supak sa Article 126 sa Labor Code nga nagdili sa korte o tribunal sa pag-isyu og injunction batok sa proseso sa Regional Wage Boards.
Matod sa senador, dakong epekto kini sa mga trabahante nga nagsalig sa wage increase tungod sa padayon nga pagsaka sa presyo sa mga batakang panginahanglanon.
Gipahayag usab ni Tulfo nga magpasaka siya og balaodnon aron usbon ang maong probisyon sa Labor Code ug malikayan ang kalibog sa pagpatuman sa wage adjustments.
