Gidayeg ni Senador Risa Hontiveros, ang chairperson sa Senate Committee on Women, Children, Family Relations and Gender Equality ang pagkasikop sa usa ka Amerikanong sex offender sa dakbayan sa Talisay sa habagatang Sugbo.
Gibuhat kini nga pamahayag ni Hontiveros atol sa pagbisita niya diri sa Sugbo niadtong Sabado, Septiyembre 6 diin matod pa niini nga ang maong pugante kay nagtago-tago sa Pilipinas sulod sa kapin duha ka dekada nga walay tukmang dokumentasyon.
Gikatahong wanted sa Federal Bureau of Investigation (FBI) sa Estados Unidos si Scheur sa posesyon sa “child sexual abuse materials” (CSAEM) sa gipuy-an niini sa Talisay City, Cebu kansang gituohang sukad pa niadtong tuig 2000 nagbuhat sa iyang mga ilegal nga kalihukan.
Dugang ni Hontiveros nga usa ka concerned citizen ang mipadangat niini nga impormasyon sa makalilisang nga binuhatan sa langyaw hinungdan nga gipaabot dayon kini nila sa mga awtoridad sa hingpit nga pagkasikop niini.
Gipasalamatan sab sa senadora ang Bureau of Immigration sa ilang paspas nga aksyon aron ipaatubang na sa hustisya ang pugante.
Gani duna pay mga kasayuran nga si Scheuer kay mangabuso mismo sa iyang kaugalingong anak nga babaye nga masuk-anong gikondenar sa senadora.
Gi-alarmahan sab niini ang kaylap na nga sayup nga paggamit sa mga modernong teknolohiya ilabi na ang artificial intelligence (AI) sa mas sayon ug paspas nga mga exploitative content.
