LAPU-LAPU CITY-Mibisita si Senador Bong Go sa temporaryong evacuation center kagahapon adlawa, Disyembre 19, 2023 sa mga nasunogan sa Sitio Sta Maria Barangay Pusok dakbayan sa Lapu-Lapu aron motunol ug mga hinabang.
Kauban ni Senador Bong Go si Philip Salvador, usa ka artista nga gidawat nila ni Mayor Junard “Ahong” Chan ug Kongresista Cindi Chan sa pagtunol sa mga hinabang ngadto sa mga nasunogan sa Sityo Santa Maria.
Gibutyag ni Bong Go nga iyahang gisusi og tuyo ang Lapulapu gumikan sa nahiaguman sa mga katawhan niini.
Kon diin, nakatala na ang LapuLapu City Disaster Risk Reduction and Management Office kon LDRRMO og 2,202 ka nga pamilya ug 5,045 ka mga indibidwal nga naapektohan sa sunog na nahitabo niadtong disyembre 12 ngadto sa nahisgutan nga lugar.
Matod pa ni Bong Go lisud ang masunugan diin ‘back to zero’ ang mga pamilya og ingun man aduna siya’y nasaksihan nga nag birthday kagahapon adlawa diin nangasunog ang tanan nga mga gamit niini.
Subay niini, gusto usab ni Bong Go nga mag tinabangay ang tanan katawhan ilabi na sa kalisud sa panahon.
