Gidepensahan ni Senador Imee Marcos ang iyang kaugalingon nga nagkanayon nga wala siyay giyatakan sibisan kinsa human kini nirekomendar sa mga kongresista nga hulipan si House Speaker Martin Romualdez imbes nga iduso ang impeachment ni Bise Presidente Sara Duterte.
Matud niini nga sugyot lang ang maong pamahayag ug wala siya magduso niini.
Gipasabot usab sa Senador nga nihimo siya sa iyang sugyot ngadto sa mga kongresista tungod kay bisan kinsa nga ilang ma-impeach ang ilang gipuntirya ug niinsistir nga mas maayo nga dili na lang manghilabot sa mga pinili sa katawhan.
Kahinumdoman nga unang girekomendar ni Senador Marcos ang paghulip sa kasamtangang Speaker sa House of Representatives uban sa iyang boto pabor sa pag-archive sa articles of impeachment batok kang Bise Presidente Sara Duterte sa Senado niadtong Miyerkules, Agosto 6.
Ingon man nga daghang mga lider sa Kamara ang misaway sa sugyot sa Senadora.
Apil na niini si House Deputy Speaker David Suarez kinsa niingon nga way katungod si Senador sa pagdiktar kon kinsa ang mangulo sa Ubos Balay Balauranan.
Matod niya nga ang maong desisyon nagdepende lang sa mga napiling miyembro sa balay.
Matud pa usab sa kongresista nga si House Speaker Romualdez milihok subay sa konstitusyon dihang iyang gipangunahan ang transmission sa articles of impeachment batok kang VP Sara aron maseguro ang accountability.
