Giandam na sa Senado ang mga sapot nga gamiton sa mga senator-judges sa umaabot nga impeachment trial ni Bise Presidente Sara Duterte.
Kini ang gibutyag ni Senador Alan Peter Cayetano ug gikumpirma ni Senate Secretary Renato Bantug Jr. niadtong Biyernes.
Gipahayag ni Bantug Jr., nga ang fitting sa mga Senador sa pagpahiangay sa ilang mga robes nagsugod duha ka semana ang milabay.
Matod niya nga maroon ang maong mga sapot ug susama sa disenyo sa mga robes nga gigamit sa impeachment trial ni kanhi Supreme Court Chief Justice Renato Corona.
Gipaambit usab ni Cayetano ang pipila ka mga pagpangandam sa iyang buhatan alang sa impeachment trial lakip na ang pagpalit og mga bag-ong libro nga may kalabotan sa balaod.
Kung kahinumduman, una nang nagtakda si Escudero og tentative date sa pagsugod sa impeachment trial ni Duterte sa Hulyo 30.
