CEBU – Nisaad si Senador Win Gatchalian nga iyang ibalik sa senado ang balaodnon nga gitumong sa paghatag og saktong kapuy-an sa mga biktima sa kalamidad, ilabi na sa mga biktima sa dagkong sunog.
Kini human nakita sa senador ang kalisod nga nahiagoman sa mga biktima sa katalagman diin makaluluoy ang ilang kahimtang sa mga evacuation center.
Matod niya, kon duna pay tarong o disenteng puy-anan ang gobyerno alang niadtong nagpuyo sa danger zones o fire prone areas, malikayan unta ang mga katalagman sama sa dagkong sunog diin gatosan ka pamilya ang maapektuhan.
Gipahibawo kini sa Senador human niya gibisita ang dakong sunog nga nahitabo sa Sitio Paradise Brgy. Looc dakbayan sa Mandaue Cebu diin iyang gibisita ang fire scene ug personal nga nanghatag og gatusan ka sakong bugas ug mga grocery sa mga biktima sa dakong sunog dinhi sa Mandaue niadtong Nobiyembre 23 diin 250 ka mga balay ang naugdaw.
Sa wala pa si Senador Gatchalian, personal usab nga nanghatag og hinabang sa kapin tres mil ka mga biktima sa sunog dinhi sa dakbayan sa Mandaue ang iyang mga kaubang senador nga sila si Senador Bong Go, Senador Ronald Bato Dela Rosa ug Senador Imee Marcos.
