Posibleng makapagawas na og pinal nga desisyon ang Senate Impeachment Court sa giatubang nga impeachment trial ni Bise Presidente Sara Duterte sa Disyembre 16, 2026.
Mao kini ang gipahayag sa tigpamaba sa impeachment court nga si Reginald Tongol niadtong Biyernes.
Gipasabot ni Tongol nga bisan pa man kini ang ilang target nga petsa, depende gihapon kini sa mga mahitabo sa mismong hearing. Apan tungod sa dagan sa pagsulay karon, mas misaka ang kumpyansa sa impeachment court nga mahuman ang trial sa wala pa ang holiday recess sa Senado.
Gikan sa orihinal nga banabana nga molungtad kini hangtod sa Pebrero o Marso—sumala sa gilatid sa pre-trial order, ang impeachment trial nag-una karon og mga 20 ka adlaw sa gikatakdang iskedyul.
Nahitabo kini bisan pa man sa pagkansela sa mga hearing niadtong Septiyembre 30 ug Oktubre 2, ingon man sa gipamub-an nga hearing niadtong Oktubre 1.
Dugang pa niya, kung i-drop sa prosecution ang Article 3 nga bahin sa alegasyon sa bribery, mahimong mag-una pa gani ang trial og hangtod sa 27 ka adlaw sa iskedyul.
Hinuon, gipatin-aw ni Tongol nga dili awtomatikong mosunod dayon ang hearing sa depensa inag kahuman sa prosecution.
Kinahanglan pa unang mopakita ug mopasaka ang prosecution sa ilang pormal nga tanyag sa ebidensya, diin hatagan og higayon ang depensa nga makahatag sa ilang komento.
Sumala pa ni Tongol, magdepende na sa desisyon ug kagustuhan sa presiding officer ug sa mga senator-judges kung unsaon ang paghan-ay sa iskedyul alang sa formal offer ug sa pormal nga pag-abli sa pagpresenta sa ebidensya sa bahin sa depensa.
