CEBU CITY-Gipahigayon kagahapon adlawa, Enero 10, 2024 ang send-off ceremony alang sa mga uniformed personnel gikan sa nagkalain-laing ahensya sa kapulisan kalabot sa kasaulogan sa ika-459 nga fiesta señor sinulog festival nga sugdan karon adlawa.
Gisalmotan kini sa mga personahe sa Armed Forces of the Philippines, Philippine National Police, Highway Patrol Group, Traffic Enforcement Unit, K-9, Air Force of the Philippines, Special Weapons and Tactics (SWAT), Philippine Navy, Philippine Coast Guard, Disaster Risk Reduction & Management Office, Bureau of Fire Protection, Department of Health ug Cebu City Transportation Office.
Gipangunahan kini ni sa mga kawani sa Police Regional Office Central Visayas ug Cebu City Police Office ug ingon man ni Cebu City Mayor Michael Rama ug ubang opisyal sa kagamhanan sa dakbayan sa Sugbo.
Mao kini ang gibutyag ni Police Colonel Ireneo Dalogdog, ang City Director sa Cebu City Police Office.
Sa kinatibuk-an, kapin sa usa ka libo ka security forces ang gipakatap aron masiguro ang kahapsay ug kalinaw sa Sinulog 2024.
Dugang ni Dalogdog nga gipanglantawang mu-doble o mu-triple pa ang gidaghanon sa mga mosalmot sa mga nakalinyang aktibidad alang sa Sinulog festival 2024.
Kini gumikan kay giwagtang na ang mga restrictions sa pabiyahe, hinungdan nga daghan usab nga mga langyaw ang gipanglantawan nga musalmot sa maong kasaulogan.
Mipasalig usab ang pangu sa CCPO nga ilahang paningkamotan ang usa ka malampuson nga Sinulog 2024.
Gani, magsugod na sila sa pagpakatap og mga personahe sa kapulisan ala una sa kadlawn ugmang adlawa, subay sa ipahigayon nga Walk with Jesus.
Sa susamang higayon, gipanghinaot usab sa direktor ang kooperasyon sa publiko alang sa usa ka hapsay ug malinawon nga kasaulogan sa ika-459 nga Fiesta Señor.
Sa pikas nga bahin, sa nahimong pamahayag ni Cebu City Mayor Michael Rama sa nasangpit nga send off ceremony, iyang gipasiugda ang panaghiusa sa Sugbo kalabot sa nahisgutang okasyon bisan pa man problema nga gi-atubang niini ilabi na mahitungod sa venue.
