CEBU CITY– Hapit dili na makaagi ang mga tao sa venue sa Bombo Medico 2019 nga nahimutang sa Colegio Del Sto. Niño sulod sa Basilica Minore Del Sto. Niño, Cebu City para sa libreng serbisyong medikal tungod sa kahuot sa nagpadayong pagdagsa sa mga tao.
Muabot na sa dul-an 3,000 ka tao ang naa sa venue ug naka-avail sa mga medical services.
Samtang naa sa 1.4 million pesos worth of medicines usab ang tanyag sa Bombo Radyo Cebu para sa mas nanginahanglan nga gikan pa mismo sa lain-laing lugar sa probinsya sa Sugbo.
Nunot niini,usa ka pasyente ang sobrang nalipay sa iyang ‘experience’ tungod kay natagaan og pagtagad ang iyang gihambin sa lawas ilabina kay daghan matud pa siya og sakit.
Pagsaysay pa ni Francisco Bisnar, 70 anyos nga taga Naga City, Cebu nga tungod sa kalisod sa kinabuhi ug tungod kay nag-inusara nalang siya kinabuhi bisan paman og duna siyay mga anak kinsang dili man matud pa mubisita kaniya mao nga wala siyay kwarta nga ipatambal.
Duna matud pa siya’y sakit sa prostate, arthritis, usahay atakehon matud siya sa ubo nga inubanan pa og dugo, nagkalisod usab matud pa kini og lakaw, lisod sa iyang pag-ihi ug hanap na ang panan-aw.
Hinungdan nga nakahilak kini sa dihang nadawat niya ang mga libreng tambal sa tumang kalipay.
Dako usab ang pasalamat niini sa Bombo Radyo Philippines ug gidayeg pa ang sama niining matang sa pagpanerbisyo.
