Nakagawas na sa bilanggoan kagahapon Huwebes, Mayo 14, 2026 ang 68-anyos nga si Ireneo Vidal kinsa gidakop sa mga sakop sa Cebu City Anti-Mendicancy Office (CCAMO) tungod matud pa naabtan kini nga nanglimos sa Colon St, Dakbayan sa Sugbo niadtong Mayo 7 diin nakalapas kini sa City Ordinance nga nagdili sa pagpanglimos.
Matud ni Cebu City Councilor Jun Alcover, Chairman sa Committee on Senior Citizen nga sila mismo ang personal nga ni proseso sa kaso nga gipasaka batok ni vidal hangtud hinungdan nga naangkon niini ang kagawasan.
Mipasalig usab si Alcover nga buhatin ang tanan aron muasikaso ni Vidal hangtud nga mahuman ang iyang kaso diin aduna pud silay gitagana nga abogado nga mukupot niini.
Dugang pa, nga pangitaon usab nila ang uban pa nga kabanay sa maong tiguwang ug sigurohon nga di na kini mubalik sa dalan apan kung wala na gyuy muatiman niini, makig-alayon sila sa Department of Social Welfare Services kun DSWS.
Gawas niini, ang konsehal mibutyag nga ilang susihon o imbetigaran ang giingung pagpanagmal sa mga sakop sa CCAMO batok sa tiguwang atol sa pagdakop.
Giklaro usab sa maong konsehal nga ang iyang tabang dili lang kay tungod Chairman siya sa Committee on Senior Citizen apan tungod kay nagpakabana siya ilabi na konstitwenti kini sa Dakbayan.
Samtang si Vidal mipaabot sa iyang pagpasalamat ug kalipay nga nakagawas na siya sa prisohan hinungdan nga nagkita na siya sa iyang apo.
