CENTRAL VISAYAS-Gitino ni Sen. Sherwin Gatchalian nga panahon na nga susihon pagbalik sa Department of Education ang comprehensive sexuality education programs aron mapugngan ang mga kababayen-an nga mi-undang sa pagtungha tungod sa sayo nga pagmabdos.
Atol sa pakighinabi sa Bombo Radyo Cebu Newsteam kang Dr. Salustiano Jimenez, ang Regional Director sa DepEd Central Visayas, nga adunay pagsaka sa kaso sa teenage pregnancy sa Central Visayas.
Matud pa sa Director, nga muoyon kini sa gisugyot nga tun-an pagbalik ang naasoy nga programa arun mahatagan og kaamguhan ang mga kabatan-onan kung unsa ang sangpotanan sa ilahang mamahimong desisyon kalabot sa pakighilawas nga wala pa sa saktong edad ug panahon.
Ug giklaro sa opisyal nga wala kini nagpasabot nga tudluan niini ang mga bata kung unsaon ang pakighilawas apan ang mga ‘sangpotanan’ lamang.
Gumikan matud pa niini nga kung wala silay kasayuran sa ilang mga lawas, dili nila mahibal-an ang mga peligro kung sila magmabdos og sayo, nga mamahimong hinungdan nga maka-undang sila sa pagtungha ug maguba ang ilahang kaugmaon.
Una niini, nipagawas og pamahayag ang Commission on Population and Development (Popcom) 7, nga alarming na ang Kaso sa teenage pregnancy sa Central Visayas, kini human nga misaka sa tuig 2022 kung itandi sa tuig 2021.
Nasayran, nga sa tuig 2022, ang Probinsiya sa Sugbo adunay labing taas nga kaso sa teenage pregnancy sa rehiyon, human nakatala og 5,106 ka kaso, gisundan sa Negros Oriental nga adunay 2,364 ka kaso; sa Bohol adunay 1,625 ka kaso; ug sa Cebu City adunay 1,504.
Samtang ang dakbayan sa Lapu-Lapu nitala og 586 ka teenage pregnancies, Mandaue City, 475 ka kaso; ug Siguijor, 116 ka mga kaso.
