Gipalawman karon sa Parian Police Station ang imbestigasyon kalabot na sa pagdiskobre sa gidudahang pakete sa shabu sulod sa opisina ni suspended Brgy. Zapatera Captain Francisco Benedicto.
Una niini, mibutyag ang acting barangay captain nga si Juan Flores Jr. nga gi-ablihan ang lawak ni Benedicto aron mokuha sa cord sa biometrics machine.
Nasayran nga nakasulod si Flores sa buhatan ni Benedicto ubos sa pagtugot sa barangay council.
Pagkalabay sa pipila ka gutlo, aksidente nilang nakaplagan ang usa ka gidudahang pakete sa shabu nga nakabutang sa blue envelope.
Sa tabang sa mga sakop sa kapulisan, gikuha ni Barangay Councilor Helen Grace Yap ang shabu sa envelope ug gitugyan kini ngadto sa kapulisan aron himoong ebidensya.
Nagkanayon si Police Chief Master Sergeant Rommel Dancog sa Parian Police Station nga sutaon pa sa ilang imbestigasyon kung kinsa man ang tag-iya sa shabu nga nakabutang sa buhatan sa barangay captain.
Dugang pa niini nga ila pang subayon kung aduna bay nahitabong trespassing sa wala pa ang pagkakaplag sa shabu.
Anaa na sa PNP Crime Laboratory ang maong pinaketeng shabu subay na sa ilang imbestigasyon.
