CEBU-Patay ang 10-anyos nga batang lalaki samtang laing 3 ang naangol human naigo sa mga buak nga tiles ug bato human mibuto ang pabuto nga gitawag og “Goodbye Philippines” atol sa pagsugat sa Bag-ong Tuig sa Purok Camunggay, Barangay Candulawan, dakbayan sa Talisay, niadtong Miyerkules, Enero 1, 2025.
Gihulagway ni kapitan Josefina Concial sa Candulawan nga daw buto sa transformer ang iyang nabati apan diay usa ka iligal nga pabuto nga “goodbye philippines”.
Daling mirespondi ang mga responder sa Talisay City Disaster Risk Reduction and Management Office human nadawat ang taho apan, subo nga pamalandungon nga ang 10-anyos nga batang lalaki kinsang residente sa nasangpit nga dakbayan kay diha-diha nga namatay human ang mga hait nga mga tinumpag kay mitusok sa iyang dughan nga miresulta sa hinanaling kamatayon niini.
Ang ubang naangol mao ang 16 anyos nga naigo sa iyang ang itlog, naukab ang tuhod sa 10-anyos samtang nakaangkong ang laing 10-anyos sa iyang mata ug nagkalain-laing parte sa lawa, ingon man nga napaso ang 17-anyos.
Basi sa imbistigasyon nga ang upat ka bata kay nipunit sa nikagar nga pabuto ug ila kining gihuho ug gidat-ugan sa binuak nga tiles ug mga bato dayon ila kining gidakdakan og laing bato hinungdan sa pagbuto niini.
Gikompirmar usab ni Concial nga gigukod na karon sa mga otoridad ang 20-anyos nga lalaki kinsa giingong miikyas human sa pagbuto.
Sa laing bahin, patay usab ang 23-anyos nga lalaki nga nailhang vlogger nga si Clifford Amarilla Remis, human naigo sa pabuto ang iyang nawong.
Sa pakighinabi sa Bombo Radyo Cebu kang PLt. Benedicto Bobilles, ang deputy police chief sa lungsod sa Asturias, diin iyang gipaambit nga ang biktima nakaangkon og abli nga samad o dakong samad sa agtang, ulo, ug sa iyang dughan.
Ug sa dihang nakita sa iyang mga kauban nga wala na kini makabarog ug mibangon human naigo sa iyang nawong, dali kining gitabangan ug gidala sa balay sa iyang ginikanan una pa gidala sa tambalanan diin gideklarar nga dead on arrival.
Nasayran usab nga ang duha ka pyrotechnic bombshells gipalit sa usa ka Firecracker stall sa SRP.
