Giklaro sa Vatican niadtong nakalabayng adlaw nga si Hesus lamang ang manluluwas sa kalibutan, ug dili ang Birhen Maria, sukwahi sa gisulti sa pipila ka mga opisyal sa simbahan.
Sa usa ka bag-ong mando nga giaprobahan ni Pope Leo XIV, ang Dicastery for the Doctrine of the Faith nagmando sa 1.4-bilyones nga mga Katoliko sa kalibutan nga dili tawgon si Maria nga “co-redeemer,” o co-savior sa katawhan.
Sumala sa dokumento, ang paggamit sa titulo nga co-redemptrix dili angay ug mahimong hinungdan sa kalibog sa Kristohanong pagtuo.
Samtang giila sa Simbahang Katoliko ang importanteng papel ni Maria sa kasaysayan sa kaluwasan, si Hesus lamang ang nagluwas sa kalibutan gikan sa sala ug kapahamakan pinaagi sa Iyang kamatayon ug pagkabanhaw.
Dugay nang gidebatehan sa mga iskolar sa simbahan kung angay ba nga isipon si Maria nga kauban ni Jesus sa pagtubos.
Si Pope Francis, kinsa namatay niadtong Abril 2025, kusganong misupak sa titulo, nga gitawag kini nga “walay pulos” niadtong 2019.
Gisupak usab kini ni Pope Benedict XVI, samtang si Pope John Paul II kaniadto misuporta niini apan mihunong sa paggamit niini niadtong 1990s.
Bisan dili siya usa ka manluluwas, gipasiugda sa Vatican ang talagsaon nga papel ni Maria isip Inahan ni Hesus dinhi sa kalibutan.
Pinaagi sa pagtubag sa “Let it be” sa mensahe sa anghel, giablihan niya ang dalan alang sa kaluwasan sa katawhan pinaagi sa pagkatawo ni Hesus.
Ang bag-ong mando kabahin sa Jubilee of Marian Spirituality nga gipahigayon sa Vatican niadtong Oktubre 12, 2025, diin gipangulohan ni Papa Leo XIV ang usa ka misa sa St. Peter’s Square.
