CEBU CITY — Nanawagan ang mga sidewalk vendors ngadto ni Presidente Rodrigo Duterte aron libkason ang kamanduan niini sa paghawan sa mga nakababag sa kadalanan.
Kini human nga naglisud ang mga manindahay human sila gipahawa sa dalan Colon ug Osmeña Boulevard atol sa gipahigayong clearing operations.
Usa niini mao si Roger Dal ug nagkanayon kini nga gamay ang iyang kinitaan sukad nga gipabalhin sila sa Tabo sa Banay.
Matud ni Dal nga mas kusog ang iyang panginabuhi-an kaniadto sa dalan Colon gumikan kay daghang mga tawo ang molabay sa maong dapit matag adlaw.
Nanghinaut ang maong tindero nga kaloy-an sila ni Duterte ug sabton sa gobyerno ang ilang kahimtang.
(Mahimo ninyong i-click kining link aron makakita sa hangyo ni Dal)
Samtang nagkanayon si Emmalyn Aliviano, ang tigpamaba sa KILUSAN-Cebu, nga dili gyud mahimong ipadaplin ang mga sidewalk vendors sanglit sila man ang major stakeholders sa dakbayan.
Gibarugan ni Aliviano nga usa ka disente ang panginabuhi sa mga sidewalk vendors gumikan kay mituman sila sa mga patakaran sama lang sa pagbayad og buhis o “alkabala” sa gobyerno.
‘MISUNOD LANG SA DILG ORDER‘
Apan gibarugan gihapon ni Cebu City Mayor Edgardo Labella nga dili gayud mahimong makapaninda ang mga mamaligyaay sa daplin sa dalan ubos sa order sa Department of Interior and Local Government (DILG).
Matud ni Labella nga klaro ug tataw ang kamanduan ni Duterte nga mao ang paghawan sa mga makababag sa dalan.
Mihangyo si Labella nga sabton sa mga mamaligyaay ang ilang gibuhat diin igo lang sila nga mituman sa maong order.
Una nang mipadayag ang mayor nga hatagan og higayon ang mga sidewalk vendors nga magpadayon sa ilang panginabuhian pinaagi sa pagbalhin sa laing dapit.
Suspensohon sa DILG ang local chief executive nga wala misunod sa kamanduan nga mao ang paghawan sa mga nagbabag sa kadalanan.
