CEBU – Plano karun sa mga organizers sa Pasigarbo sa Sugbo 2022 nga magpatuman ug signal shutdown atol na sa culmination sa maong aktibidad nga ipahigayon sa Cebu City Sports Center.
Gibutyag ni Cebu Provincial Governor Gwendolyn Garcia nga ilahang gikonsiderar ang pagbutang ug signal jammers sa palibot sa CCSC kung diin mag-perform ang mga contingents sa Pasigarbo sa Sugbo karung umaabot Agosto 28.
Matud pa, ang maong plano kay isip kabahin sa ilahang security measures.
Ang mao nga plano kay pinasubay usab sa nakalabay nga mga Sinulog festival kung diin ang kapulisan ug organizers ang nagkasabot nga temporaryong i-shutdown ang mga mobile phone signals sa mga key cities sa Metro Cebu arun nga mapugngan ang mga hulga sa seguridad.
Mukabat sa 50 ka mga contingents gikan sa nagkadaiyang lokalidad sa Cebu Province ang musalmot sa Pasigarbo sa Sugbo, diin usa sa mga highlight sa usa ka buwan nga selebrasyon sa ika-453 nga founding anniversary sa probinsiya.
