Gidali pagdala pag-usab sa ospital ang bantugang mang-aawit nga si Lionel Richie tungod sa problema sa kasingkasing.
Gibutyag sa iyang kampo nga nahospital siya tungod sa atrial fibrillation, usa ka kondisyon nga gihulagway pinaagi sa dili regular nga pagpitik sa kasingkasing.
Gipasabot sa mga doktor nga ang pagtambal niini usa ka minimally invasive nga pamaagi—usa ka operasyon nga gamay ra ang himuong samad sa kasingkasing aron mapahunong ang sayop nga mga electrical signal.
Tungod niini, napugos ang mang-aawit sa pagkansela sa mga pasundayag uban sa grupong “Earth, Wind & Fire” sa San Francisco, Chicago, ug Columbus, Ohio.
Kini ang ikatulong higayon nga na-ospital ang mag-aawit sa bag-ohay nga mga bulan.
Niadtong Agosto, gidala usab siya sa usa ka ospital sa St. Louis ug migahin og pipila ka adlaw sa Intensive Care Unit (ICU) una pa siya gipagawas.
