MIHANGYO si Cebu City Councilor Alvin Dizon nga moluwat og executive order si Mayor Edgardo Labella aron i-ban ang paggamit sa mga single-use plastics ug styrofoam sa City Hall ug sa mga aktibidad nga gipasiugdahan sa City Government.
Atol sa privilege speech ni Dizon sa regular session sa konseho, gi-awhag ni Dizon ang mga kauban niyang konsehal nga likayan ang paggamit sa mga single-use plastics gumikan kay nabalaka kini sa epekto sa kalikupan ilabi na sa kadagatan.
Nasayran nga 32 porsyento sa mga basura nga nakolekta sa dakbayan kay mga plastic wastes ug modugta kini pagkalabay sa minilyon ka tuig.
Gihimug-atan sa konsehal nga ang mga plastic nga basura mao ang hinungdan sa mga pagbaha ug pagkahugaw sa mga kasapaan.
Matud ni Dizon nga apektado ang panglawas sa tawo ug sa mga kahayupan tungod sa mga plastic nga basura.
Subay na sa iyang awhag, nakahimo og kasabutan ang mga konsehal diin mogamit na lang sila og water tumblers aron dili na sila makadala og mineral water bottles sulod sa konseho.
Nalipay si Dizon sa nadawat niyang suporta gikan sa konseho.
Gihingusgan ni Dizon ang City Government nga mo-implement og mga lakang aron malikayan ang paggamit sa mga single use plastics.
