CEBU CITY — Gi-awhag ang tanang mga mamyestahay sa Sinulog ning tuiga nga likayan ang paggamit og styrofoams ug single-use plastics isip sudlanan sa mga pagkaon.
Kini human nga naaprubahan sa Cebu City Council pinaagi sa usa ka resolusyon sa tinguha nga mamentenar ang kahinlo sa palibut atol sa kapyestahan.
Matud sa nagsponsor sa resolusyon nga si Coun. Alvin Dizon nga magbutang ang Cebu City CENRO og mga trash bins ug eco-stationsa sa sulod sa Cebu City Sports Center, ingon man sa Sinulog routes.
Kini aron mahinumduman sa tanang mga mamyestahay nga magpabiling responsable sa pagbitbit sa ilang mga basura.
Nasayran nga nakahipos ang city government og 11 ka tonelada sa basura sa nakalabay nga tuig atol sa fiesta ni Señor Sto. Niño.
Mihangyo usab si Dizon ngadto ni Mayor Edgardo Labella nga mo-isyu og executive order nga nagdili sa paggamit og mga single-use plastics sa tanang mga aktibidad nga gi-organize sa kagamhanan sa syudad.
Dugang pa niini nga iyang hangyuon ang mga establisimento sa palibut sa Sinulog routes nga magbutang og kaugalingong eco-stations aron mahipos ang mga basura sa ensakto nga pamaagi.
Mihangyo usab ang maong konsehal sa katawhan ug sa tanang mamyesta nga magbaton og responsibilidad sa pagbitbit sa ilang mga basura.
