CEBU CITY- Nangayo ang Sinulog 2025 Security Committee og dugang numero sa kapulisan nga ipakatap sa umaabot kapistahan sa Enero 2025 sa dakbayan sa Sugbo.
Kini nga Security Committee gipangulohan sa Cebu City Police Office (CCPO) nga gipanglantawan ang mas daghang dagsa sa mga bisita nga muari sa dakbayan sa inilang Sinulog Festival sa pagbalik niini sa Cebu City Sports Center (CCSC).
Sa pamahayag ni Cebu City Councilor Phillip Zafra, ang Chairman sa Committee on Peace and Order diin gitataw niini ang pagpanginahanglan sa mas dugang manpower nga gikan sa Police Regional Office – Central Visayas (PRO-7), Armed Forces of the Philippines (AFP), Association of Barangay Councils (ABC), ug sa mga kolehiyo nga ubos sa pagdumala sa Commission Higher Education (CHED) aron sa pagtabang sa crowd control.
Bana-bana ni Konsehal Zafra nga mu-triple ang ihap sa mga bisita sa Sinulog Grand Parade tungod sa pagbalik niini sa naandang venue sa karaang Abellana Sports Complex sa Osmeña Boulevard ning dakbayan.
Dugang pa, nga giawhag Usab sa opisyal ang kadagkuan sa CBRT Project nga paspasan ang trabaho aron dili hulga sa kaluwasan sa publiko.
Ingon man nga gipanglantawan niini ang pag-apil sa criteria for judging ang tarong nga paghipos sa mga props aron kini dili magkatag sa kadalanan sa syudad.
Nanawagan usab ang opisyal sa publiko sa ilahang kooperasyon aron sa kahapsay og kalinaw sa okasyon panahon sa Sinulog ug magmalampuson ang kapistahan.
