CEBU CITY — Gitataw ni Cebu City Mayor Edgardo Labella nga dili manginlabot ang Sinulog Governing Board (SGB) sa marketing ug operasyon alang sa pagpahigayon sa Sinulog Festival.
Matud ni Labella, isip usa SGB chairman, nga gikonsiderar lang sa board ang peace and order, disaster prevention, ug trapiko alang sa ipahigayong pyesta sa Balaang Bata karong Enero.
Sa pamahayag nga giluwatan sa SGB, nagpatabang sila sa mga ahensya sa gobyerno sama lang sa Philippine National Police, Department of Education, Land Transportation Franchising and Regulatory Board, Cebu City Transportation Office, Basilican Minore del Sto. Niño, ug uban pang sektor.
Dugang pa ni Labella nga ang Sinulog Foundation Inc. (SFI) mao ang mag-atiman sa mga pagpangandam ug marketing sa maong halapad nga pyesta sa Sugbo.
Samtang gitataw usab sa Sinulog Foundation, pinaagi sa ilang statement, nga nakig-alayon ang Sinulog Governing Board kanila alang sa mga pagpangandam sa kapistahan sa Sinulog.
