CEBU CITY-Nisugyot ang usa ka konsehal sa dakbayan sa Sugbo nga i-adjust sa sayo pa ang pagsugod sa kasaulogan sa Sinulog alang sa kasayon ug kaluwasan sa mga partisipante ug mga tumatan-aw.
Kini ang sugot ni Konsehal Philip Zafra, ang tsirman sa konseho sa Committee on Peace and Order, nga kini iyang “suggestion and recommendation” base sa iyang obserbasyon sa kalihokan sa miaging tuig.
Hinuon, rekomendasyon gihapon kini tungod kay mag-walk-through usab sila sa venue sa maong kalihukan karung adlawa, Nobiyembre 17, aron susihon kon feasible ba ang iyang proposal.
Sa miaging tuig, nagsugod ang Sinulog grand parade sa City De-Mare mga alas 9 sa buntag ug ang kainit maoy usa sa mga problema nga giatubang sa mga tumatan-aw ug mga partisipante sa grand parade.
Dugang ni Zafra nga alang kaniya mas maayo usab nga adunay “parade type” ang mga contingent atol sa street parade.
Dugang pa, nga wa silay mahimo sa maong venue tungod sa nagpadayong construction sa Bus Rapid Transit (BRT) subay sa Osmeña Boulevard.
Sa niaging mga tuig, ang Osmeña Boulevard maoy gigamit nga rota sa parada, ug mao usab kini ang lugar nga nahibaw-an nga daghang tawo panahon sa pagsaulog sa Sinulog.
