CEBU CITY-Patay ang usa ka siyam ka bulan nga batang lalaki human nga nalumos sa usa ka balde nga tubig sulod sa iyang balay samtang ang iyang mga ginikanan natulog sa Miyerkules sa buntag, Hunyo 28, 2023.
Nahitabo ang insidente pasado alas 9 sa buntag sa Sitio Lawis, Barangay Lorega-San Miguel, dakbayan sa Sugbo.
Sa imbistigayun sa kapulisan, gitino ni Police Colonel Ireneo Dalogdog ang hepe sa CCPO, nga ang lola sa bata maoy nakamata ug nadiskubrehan nga usa sa ilang kaluha ang naunlod sa tubig sulod sa balde nga ilang gigamit nga tipiganan og tubig panghugas sa plato.
Dugang pa, nga wala mabantayan nga nakamata ang masuso dihang nakatulog kini tali sa alas 7 hangtod alas 8 sa buntag human gipakaon og sa gatas ug giatiman ang kaluha sa masuso.
Nianang mga panahona, ang tanan sa balay natulog pa, lakip ang inahan ug amahan sa bata.
