CEBU CITY-Gihatod na sa katapusang pahulayan sa Canduman, Mandaue City si Police Capt. Delfin Bontuyan, kinsang gipusil-patay sa miaging semana sa North Reclamation Area.
Una niini, nagtapok ang mga kabanay ug suod nga higala ni Bontuyan atol sa misa requiem nga gipahigayon sa San Isidro Parish sa Brgy. Talamban sa dakbayan sa Sugbo.
Subay niini, nagkanayon si Police Capt. Beethoven Joven Taneo sa Talamban Police Station nga hatagan si Bontuyan og 21 gun salute isip pagsaludo sa serbisyo nga iyang gibuhat. Kini nunot na sa hangyo gikan sa PRO-BARMM.
Nagsul-ob og puti nga t-shirt ang mga kabanay ni Bontuyan nga dunay nakasuwat nga “No retreat, no surrender”.Kini matud pa ang pagpadayag sa nagpadayong siyagit sa mga kabanay sa namatay nga kanhi CIDG-7 senior investigator nga mao ang pagkab-ot sa hustisya sa kamatayon niini.
Mitambong usab sa misa requiem si outgoing Cebu City mayor Tomas Osmeña kauban ang iyang asawa nga si Kon. Margot Osmeña.
Giila sa kapulisan si Bontuyan isip usa sa mga banggiitan nga imbestigador sa CIDG-7. (FDP/GN)
