Gibutyag ni Mandaue City Administrator Atty. Gonzalo “Sally” Malig-on, Ang dakbayan sa Mandaue aduna pay 11 ka aktibong evacuation centers sukad niadtong Nobiyembre 19, 2025, diin adunay kinatibuk-ang 496 ka pamilya o 2,126 ka mga indibidwal ang nawad-an sa pinuy-anan tungod sa Bagyong Tino.
Pipila sa mga lugar nga ana pay mga bakwit lakip ang Mandaue City Central School sa Barangay Alang-Alang, Canduman Elementary School, Cabancalan Elementary School sa Casuntingan, ang Casuntingan Gym, Maguikay National High School, Maguikay Elementary School, Paknaan Centro Gym, Tabok Day Care Center, Tingub National High School, ug ang Umapad Gymnasium. Ang Paknaan Centro Gym gikatakdang i-decampment karong adlawa.
Sigon ni Malig-on, nga ang ihap sa mga bakwit nag-anam og pagkunhod samtang ang mga barangay nagpadayon sa pagsirado sa pipila sa ilang mga evacuation centers.
Dugang pa niya nga ang siyudad padayong nanghatag og hinabang kay naglihok kini aron matabangan ang mga apektadong pamilya sa pagtukod pag-usab sa ilang kinabuhi.
Namatikdan ni Malig-on nga kadaghanan sa mga nagpabilin sa mga evacuation center mga residente kansang mga balay grabe o hingpit nga nadaot.
Giklaro usab niini nga samtang ang mga gym ug eskwelahan gigamit gihapon isip temporaryo nga mga puy-anan, ang gidaghanon sa mga bakwit hinay-hinay nga mikunhod.
Giangkon ni Malig-on nga ang Quick Response Fund (QRF) sa siyudad dili igo aron matabonan ang tibuok gasto sa pagtukod pag-usab.
Gihimug-atan niini nga dili mahurot sa Siyudad ang tibuok QRF niini karong sayo, labi na nga nagkaduol ang Disyembre.
Tungod niini, nangayo og tabang ang Siyudad gikan sa Gobyerno Nasyonal, sa Gobyerno Probinsya, ug sa Opisina sa Presidente.
Gipasalig usab ni Malig-on nga ang tabang sa pagkaon alang sa mga bakwit padayon nga gihatag sa Gobyerno sa Siyudad sa Mandaue.
